Жаңалықтар

Войти через

  • 17:57:02
  • -7°C

Воскресенье, 24 января

 

Жаңалықтар

Тоқаев Абай жайында мақала жазды

Бүгін Абай күніне байланысты Мемлекет басшысы Қасым-Жомарт Тоқаев «Егемен Қазақстан» газетінде «Абай – рухани реформатор» атты мақаласын жариялады. Төменде мақала мәтінін ұсынамыз. 10 тамызда ұл­­ты­­мыздың ұлы ақы­ны, ойшыл тұл­­ғасы Абай Құнан­­бай­­ұлы­ның ту­ға­нына 175 жыл тол­ды. Бұ­дан ши­рек ға­сыр уақыт бұ­рын Тұңғыш Прези­дентіміз – Елбасы Нұрсұлтан Назарбаев­тың бастамасымен Абайдың 150 жыл­дығы ЮНЕСКО деңгейінде өткі­зіл­ген еді. Бұл торқалы той – сол тама­ша дәстүрдің жалғасы. Биылғы мерейтойға орай бірқатар іс-шара жоспарланған болатын. Бірақ әлемді жайлаған індетке байланысты со­ның көпшілігін онлайн форматқа ауыс­тырдық. Әрине сан сынақтан сү­рін­беген халқымыз бұл дертті де жеңе­ді. Қиындық  өтпелі, ал Абай мұрасы мәң­гілік. Менің тапсырмам бойынша Үкімет оныншы тамызды «Абай күні» деп бел­гілеп, мерекелер тізбесіне енгізді (бірақ жұмыс күні болып қала береді). Ұлы ақынның мұрасын ұлықтауға арналған іс-шаралар жыл сайын өткі­зіліп тұратын болады. Мәселе мерейтойда емес – тұғырлы тұлғаның туын­ды­ларынан терең тәлім алуда. Абай­дың рухына тағзым ету – оның қағи­датын ұстану, аманатына адал болу. Сонда ғана жас ұрпақтың сана­сына қастерлі құндылықтарды сіңі­реміз. Біз ұлы ойшылдың өнегелі өмірі мен тағылымы туралы айтудан жа­лық­­паймыз. Әсіресе қазіргі Қазақстан қоға­мын Абайдың рухани ұстанымына сай дамыту аса маңызды. Мен бұл жөнінде «Абай және ХХІ ғасырдағы Қазақстан» атты мақаламда кеңінен айттым. Биылғы жыл халықаралық «Абай жылына» айналды. Әлемнің көптеген елдері оның шығармашылығына назар аударуда. Қазақстанның бастамасымен және ЮНЕСКО-ның қолдауымен ұлы ақынымыздың 175 жылдық мерей­тойы жаһандық деңгейде аталып өтуде. Ақынның баға жетпес мұрасын ұғын­дыру және дәріптеу – азаматтық пары­­зымыз. Өйткені Абай – әлем­дік дең­гей­дегі кемеңгер тұлға. Абай­тану­дың тұ­ғыр­намалық негізі де осы болуға тиіс. Қазір ақынның еңбектерін халық­ара­лық ғылыми айналымға енгізу үшін нақты және мақсатты жұмыс­тар қол­ға алынуда. Оның шығарма­ла­ры әлем­нің он тіліне аударылып, бас­паға әзірленді. Бұл кітаптар жүз­ден астам елдің кітапханалары мен мәде­ни орта­лықтарына жіберіледі. Бірқа­тар шетел­дік аудармашыларға, Абай­дың шығар­машылық мұрасын зерттеу­ші­лер мен насихаттаушыларға менің Жар­лығыммен мемлекеттік награда берілді. Абай рухын ұлықтау шарала­ры жалғасуда. Шетелдегі елшілік­тері­міздің жанынан Абай орталықтары ашыла бас­тады. Ақынның шығар­ма­шылығын жүйелі зерттеу үшін Л.Н.Гумилев атындағы Еуразия ұлттық университеті жанынан Абай академия­сы құрылды. Біз бәсекеге қабілетті мемлекет болу үшін Абай мұрасын естен шығармауымыз керек. Себебі ұлт ретіндегі жаңару идея­сы да оның көзқарасымен үндесіп жат­қаны анық. Келесі жылы Қазақстан Тәуел­сіз­дігі­нің 30 жылдығын атап өтеміз. Бірақ ке­зінде ұлы ойшылды қатты толған­дырған кейбір келеңсіздіктер қоғамда әлі де кездеседі. Өкінішке қарай Абай айт­қан «бес дұшпаннан» толық арылып болған жоқпыз. Азаматтарымыздың арасында жал­қаулық пен сөзуарлық жиі кездесетіні қынжылтады. Бұлар бұрынғыша той­құмарлықтан тартынбай, күнделікті тынымсыз тірлікті дәріптеудің орнына, әрбір қоғамдық оқиғадан саяси астар іздейді де отырады. Абай халықты той тойлауға емес, еңбек етуге, рухани кемелденуге шақырды. Абайдың ұлағаты әлі күнге дейін маңызын да, құндылығын да жоғалтқан жоқ. Сондықтан біз оның терең ойларына, келешектің келбетіне үңілген көрегендігіне таңырқаудан жалыққан емеспіз. Абай ілімі бүгінгі бірқатар бағыттарға орайлас келеді.   Ең алдымен, білім игеру. Біз бү­кіл әлемді ақыл-ой мен парасатты пайым арқылы ғана мойындата аламыз. За­ман талабына сай білім алу интел­лек­туалды ұлт қалыптастыруға жол ашады. Екінші, тәрбие мәселесі. Сон­дықтан, өскелең ұрпаққа дұрыс бағыт берген жөн. Ақынның «Пайда ойлама, ар ойла, талап қыл артық білуге» деген өсиетін әрдайым санаға сіңіру қажет. Үшінші, жаңа кәсіп игеру. Ақын әр қазақ өз ісінің шебері болса деп ар­­ман­дады. Әсіресе бәсекелестікке толы ал­мағайып заманда мұның мәні зор. Абай: «Мал керек болса, қол­өнер үй­ренбек керек. Мал жұтай­ды, өнер жұта­майды» дейді. Біз ең­бекке, жаңа өнер иге­руге деген көзқа­расымызды түбе­гейлі өзгертуге тиіспіз. Байлықтың да, бақыттың да кілті – өзің сүйген кәсіпте. Төртінші, ынтымақ мәселесі. Абай әрдайым қоғамның береке-бірлі­гін арттыруға ден қойды. Ол «Біріңді, қазақ, бірің дос, көрмесең істің – бәрі бос» деп, елді татулыққа шақырды. Біз аса күрделі кезеңді бастан өткеру­деміз. Осындай сәтте бір-бірімізге қол ұшын беріп, өзара мәміле мен ынты­мағымызды арттыра түсу аса маңызды. Кемеңгердің де жан-жүре­гімен тілегені жұртының амандығы мен ұлтының тұтастығы еді. Сон­дық­тан бүгінгідей қиын шақта Абай мұ­расына жүгіну өте өзекті  болып отыр. Абай өнегесінің құны дәуір алмасқан сайын артпаса, кемімейді. Ол баршаға түсінікті әрі күллі адамзатқа ортақ. Оның қара өлең болып өрілген және қара сөз болып төгілген оралымды ойлары әлі күнге дейін өмірлік бағдар болып келеді. Ұлтының болашағы үшін қам жеген ұлы ойшыл күллі жұртшылықты да махаббат пен мейірімге үндеді. Ақынның осындай адамгершілік қағидаттары еліміздің бүгінгі ұрпақтары үшін де аса қажет. Мемлекет тәуелсіздік жағдайында ұлттық сананы қайта жаңғыртуға және жаһандану өзгерістеріне бейімдеуге жалпыұлттық  тұрғыдан басымдық беріп отыр. Ұлы данышпан елдік мүддені әрдайым жоғары қоюға, алған білім мен тәжірибені халық игілігіне жұмсауға шақырды. Бүкіл адамзат үшін даму үрдісін осындай ұстаным арқылы ұғыну әрдайым маңызды болмақ. Абай – біздің ұлтымыз бен жұрты­мыз­ды танудың төте жолы. Ұлы ақын бізге мазмұндық тұрғыдан өлшеу­сіз, ха­­лық­тың рухани азығына айнал­ған мұра қалдырды. ХХІ ғасырға қадам бас­сақ та, Абайдың көзқарасы заман­ауи із­гі­лік қағидаттарына және Қа­зақ­стан қо­ғамының басты құндылық­тарына, оның бірлігі мен берекесіне толықтай сай ке­летіндігіне тағы да бір мәрте көз жеткі­земіз. Ұлы данышпан ұлттың рухани мә­дени, адами бет-бейнесін асқан көре­гендікпен сипаттаған. Оның ұлылығы да осында. Абайдың даналық сөздері қазақ халқының алтын тұғыры, түп негізімізге үңіліп, ұлттық ұстынымызды іздеген көп­теген ұрпақтың басын біріктіретін мәң­гілік рухани тірек болып қала бермек. Елбасы Нұрсұлтан Назарбаев  «Абай сөзі – қазақтың бойтұмары» деген бо­латын. Бұл тұжырым бізді ақын әлеміне терең бойлауға, жаңаша ойлауға мін­деттейді. Қазір елімізде абайтанумен айна­лы­сатын бірнеше ғылыми-зерттеу орталығы бар. Осылардың жұмы­сын жүйелеп, елордамыздағы Абай акаде­миясының төңірегіне топтастырған жөн. Академия барлық зерттеу меке­мелерінің жұмысын ғылыми тұрғыдан үйлестіруші міндетін атқара алады. Алдағы уақытта гуманитарлық пән­дер­дің бөлінбес бөлшегі ретінде «Абай­тану» курсын оқыту мәселесін қолға алу керек. Жаңа философиялық және саяси ұстаным тұрғысынан «Абай­та­ну» оқулығы мен хрестоматиясын әзір­леу қажет. Сондай-ақ Абайдың «толық адам» ілімі жан-жақты әрі терең зерттелуге тиіс. Біз Абайды ХІХ ғасырда өмір сүріп, ХХІ ғасырдың сөзін сөйлеген данышпан ретінде әлемге танытуымыз керек. Сонымен қатар оны ұлттық сананы жаңғыртуға зор ықпал еткен рухани реформатор ретінде дәріптеуге міндеттіміз. Түптеп келгенде, әрбір қазақ Абай­мен мақтануға тиіс! Халқымыздың ұлы перзентінің торқалы тойы құтты болсын!

Қапшағайда Абай шығармашылығына арналған фестиваль өтті

Қазақтың ұлы ойшылы, ақыны Абай Құнанбайұлының 175 жылдық мереейтойына орай Қапшағай қаласында мүмкіндігі шектеулі жандар арасында “ТАЛАНТТЫЛАР” фестиваль-байқауы ұйымдастырылды, деп хабарлайды Tinfo.kz. Шара “Қапшағай самға” қоғамдық бірлестігінің ұйымдастыруымен, аудандық әкімдік пен партия филиалының қолдауымен өтті. Фестивальдің мақсаты - ұлы ақынның өнегелі өмірімен таныстыру, ақынның даналығын, рухани асыл мұраларын насихаттап, өлеңдерін, әндерін мәнерлеп айтқызу. Көркем сөйлеуге, өз бетімен іздене білуге, шығарма шылықпен жұмыс істеуге көмектесу. Байқау Қапшағай қалалық кітапханасының басшысы Кенжебекова Назым Халеловнаның құттықтау сөзімен басталды. Ары қарай шара қатысушылардың өнерімен жалғасты.

Талдықорғанда Бейсен Құранбек бейнеленген муралы салынуда

Талдықорған қаласында журналист Бейсен Құранбек бейнеленген муралы салынуда, деп хабарлайды Tinfo.kz. Мурал Бейсен Құранбек басшылық еткен “Жетісу” телеарнасы орналасқан "Журналистер үйі" ғимаратының қарсы алдындағы үй қабырғасында салынып жатыр.  Суреттің төменгі жағында "Қарекет ет, батырым!" деген жазу қойылады. Аталған мурал Алматы облысы әкімдігі мен "Рухани жаңғыру" жобалық кеңсесінің қолдауымен жүзеге асырылуда. Еске салсақ, Бейсен Құранбек  осы жылдың 18 мамырында 48 жасында ауыр дерттен қайтыс болды. Ол 2014 жылдан бастап облыстық «Жетісу» телеарнасының директоры болып қызмет атқарды. 2017 жылдан бері «Қазақстан» телеарнасында «Қарекет» бағдарламасын жүргізді.

Алакөлде 700-ге мың жуық адам демалған

Биылғы шомылу мауысымынан бері Алакөлдегі демалушылар саны 629 мыңнан асты. Оларға 3 млрд 739 млн теңгенің қызметі көрсетілді, деп хабарлайды Tinfo.kz. Көл жағалауындағы санитарлық нормалардың сақталуын қамтамасыз ету мақсатында арнайы мониторинг топ құрылған. Бүгінгі күні ауданда 4 мониторинг тобы күнделікті жұмыстар атқаруда. Мониторинг тобының зерделеу жұмыстары барысында көл жағалауында құрылған барлық 17 стихиялық шатырлы лагерлер жабылды. Көл жағасындағы тыйым салынған, Заңсыз сауда жүргізген тұлғаларға ескертулер беріліп, айыппұлдар салынды. Жағалаудағы демалыс орындарындағы санитарлық жағдай қатаң бақылауға алынып, жоспарлы жұмыстар жүргізілуде.  Туризм саласындағы 262 нысанның 171-не жұмыс істеуге рұқсат берілген. Онда барлық санитарлық нормалар сақталған. Алакөл көл жағалауына  екі айдың қорытындысы бойынша 630 мың турист келсе, бұл көрсеткіш шомылу мауысымының аяғына дейін 1 млн-ға жетпек. Туристердің негізгі ағыны автобуспен келіп жатқанын ескере отырып, «Талдықорған-Өскемен» және «Үшарал-Достық» күре жолын қалпына келтіру бойынша күрделі жөндеу жұмыстары жүргізілуде. Алакөл ауданы әкімдігінің хабарлауынша, «Алматы-Жетіген-Достық» теміржолы мен «Үшарал» әуежайында «Астана-Үшарал-Астана», «Алматы-Үшарал-Алматы» (аптасына жеті күн, SCAT әуе компаниясы), «Талдықорған-Үшарал-Талдықорған» («Жетісу» әуе компаниясы) әуе рейстері қызмет көрсетуде. Санитарлық алгоритмге байланысты Үшарал әуежайы тепловизормен және ұшып келу, кету залдарында  арнайы дизенфекциялық  тунелмен қамтылған. Үшарал әуежайы арқылы күніне Нұр-Сұлтан, Алматы, Талдықорған қалаларынан қатынайтын рейстермен 180, ал көл жағалауына күніне барлығы 12 512 турист келуде. Сондай-ақ Алакөл жағалауы бойынша Көктұмада 3 шақырым, Ақшиде 10 шақырым көл жағалауын бекіту жұмыстары жүргізілуде.

Ақсу ауданында жаңа оқу жылында 12 мектеп оқушы қабылдайды

Алматы облысының Ақсу ауданында 80 оқушыға дейінгі бала санымен 12 мектеп жаңа оқу жылында оқушылар қабылдайды. Олардың 7-бастауыш, 4-шағын жинақталған негізгі және 1-шағын жинақталған орта мектеп жаңа оқу жылына дайын. Бұл білім ошақтарында 321 бала білім алады, деп хабарлайды Tinfo.kz. Ақсу ауданында ‪2020-2021‬ жаңа оқу жылын аудан бойынша 7662 оқушы бастайды деп жоспарлануда.   “Санитарлық-эпидемиологиялық талаптарды сақтау мақсатында білім ордаларында барлық қажетті заттар қойылады. Мектеп кіре-берісіне дизинфекциялық тоннель орнатылып, келушілердің барлығының дене қызуы өлшенеді. Оқушылар сабақ оқитын бөлмелерге бактерицид лампалары (кварц), санитайзерлер орнатылатын болады. Білім алушылар оқитын білім беру мекемелерінде толығымен санитарлық талаптар қатаң сақталады. Басты мақсат ұстаздар мен оқушылардың денсаулыған сақтау”, - деп атап өтті аудан әкімдігінде.

Алматы облысына шетелден гуманитарлық көмектің жаңа партиясы келді

Алматы облысы бойынша Сыбайлас жемқорлыққа қарсы қызметі «Лидер» еріктілер қозғалысымен бірге Түркиядан, Польшадан және Израильден Алматы облысына келген гуманитарлық көмекті жөнелту бойынша мониторинг жүргізді. Аталған партиямен «Дексаметазон» және «Мепрелон» препараттары, сондай-ақ жеке қорғаныс құралдары келді. Гуманитарлық көмек толығымен аймақтағы ауруханаларға арналған. Сыбайлас жемқорлыққа қарсы қызметтің бұл жұмысы тұрақты негізде жүргізіліп, гуманитарлық көмекті бөлу мен түсірудің ашықтығын қамтамасыз етуге бағытталған.

Райымбек ауданында Абай есімі ұлықталды

10 тамыз — Абай күніне орай Райымбек ауданында Абайға арналған ескерткішке гүл шоқтары қойылды, деп хабарлайды Tinfo.kz. Аудан әкімі Нұржан Құдайбергенов Сүмбе ауылындағы Абай мектебінің алдында орналасқан Абай Құнанбайұлының ескерткішіне гүл шоқтарын қойып, рухына тағзым етті. Абай жаққан сәулені сөндірмеу бүгінгі ұрпақтың басты парызы. Атаулы мереке алдағы уақытта жыл сайын тұрақты түрде аталып өтілетіні көңіл қуантады. Айта кетейік, осыған дейін  ұлы ақынның 175 жылдығына Қарасаз ауылында Райымбек ауданы әкімдігі мен «Мұқағали» журналының ұйымдастырған республика көлеміндегі әдеби кеш өтті. ЕҚазақстан Республикасы Үкіметінің қаулысымен 10 тамыз — Абай күні болып жарияланып, мемлекеттік мерекелер күнтізбесіне енгізілді. Бұл күн енді жыл сайын халықтық мейрам ретінде аталып өтілетін болады. Абай күні — қазақтың ізгілік пен өркениет өріне басқан тағы да бір қайырлы қадам.Осындай айтулы шаралар бүгінгі күнге дейін жалғасын тауып келеді.

Талдықорғанда Абай дәуіріндегі ана тақырыбы талқыланды

Талдықорғанда «Абай дәуіріндегі әйел - аналар бейнесі» онлайн конференциясы өтті. Шараға Алматы облысындағы аудандық, қалалық ішкі саясат бөлімінің басшылары мен қызметкерлері, облыстық Қазақстан халқы Ассамблеясы жанындағы аналар, қоғамдық келісім кеңестерінің төрағалары мен мүшелері қатысты, деп хабарлайды Tinfo.kz. Онлайн конференция  Абай Құнанбайұлының 175 жылдығына және «Абай күніне» орай ұйымдастырылды.   Конференцияға Алматы облыстық Қазақстан халқы Ассамблеясы жанындағы Аналар кеңесінің жетекшісі Несіпжамал Баймадиева төрағалық етті. «Заман өзгерді, заманына қарай адам да өзгереді. Бірақ, әйел – ананың еңбасты орындайтын парызы аманаты, адамзатты тәрбиелеу, тіршіліктің бастау бұлағы, отбасының өзегі, шаңырақтың шамшырағы, әдеміліктің асыл тәжі ұғымдары өзгермейді», - деп атап өтті Несіпжамал Баймадиева. Онлайн-конференцияда Қарасай аудандық Аналар кеңесінің төрағасы, Абайтанушы Бекбаева Ақлия Бекбайқызы, Алакөл аудандық Аналар кеңесінің төрайымы, Қазақстан Республикасының білім беру ісінің үздігі, Алакөл ауданының құрметті азаматы Дүйсебаева Ұлжалғас Бурасанқызы, Кербұлақ аудандық Аналар кеңесінің төрайымы, Кербұлақ ауданының құрметті азаматы Ақбасова Ғалия Ниязқызы, Сарқан аудандық Аналар кеңесінің төрағасы, ана-медиатор Калиева Гүлшарбан Мырзабайқызы, Текелі қалалық Аналар кеңесінің төрайымы, мәслихат депутаты, №5 орта мектептің директоры Иманбердиева Эльмира Сейдахметқызы, Талдықорған қалалық Аналар кеңесінің мүшесі Бердіқожаева Ләззат Алдабергенқызы Абай заманындағы «АНА» тақырыбын асқақтата көтеріп, қазіргі уақытта жан-жақты дамыған, толық жетілген тұлғаны тәрбиелеудегі, отбасының жауапкершілігі туралы, әлеуметтік ортаның бала тәрбиесіне ықпалы туралы өз ойларын ортаға салды.

Жетісулық оқырмандарға Абайға арналған жаңа кітаптар жол тартты

Алматы облысында Абай Құнанбаевтың 175 жылдық мерейтойына орай басылып шыққан жаңа кітаптар таныстырылды. "Кітапханаға кітап сыйла" акциясы аясында облыстық кітапханаға бірқатар туындылар табыс етілді, деп хабарлайды Tinfo.kz.  Жақында белгілі абайтанушы, философ Досым Омаровтың “Абай мұрасын қолдану жолдары” атты кітабы оқырмандарға ұсынылды. Кітапта Абай ілімі аясында адамзат өркениетінің құлдырауы, Кеңес Одағының ыдырау себептері, бүгінгі өтпелі кезеңнен шығу жолдары көрсетіледі. Абайдың "толық адам" ілімі талқыланып, қазақтың ұлттық идеясы ұсынылады. Сонымен бірге облыстық кітапхана қорына Ұлы Абайдың 175 жылдығына орай Роллан Сейсенбаев құрастырған 10 томнан тұратын "Қара сөздер" кітабы табысталды.Бүгінге дейін қазақ, орыс тілінде оқырманға етене танылған кітап енді ағылшын, неміс, француз тілідеріне аударылды. Тамыз айында жетісулық оқырмандарға  "Адамзаттың Абайы" атты жыр жинағы жол тартты. Кітапқа Алматы облысындағы жазба ақындардың 100-ге тарта өлең-жырлары топтастырылған. Кітапқа белгілі ақындар Нүсіпбай Әбдірахым, Сағыныш Намазшамова, Әсел Оспан, Асыл Сұлтанғазы және т.б. шығармалары енді.

Алакөл ауданында Абай күні аталып өтті

10 тамыз - қазақтың ұлы ақыны, ойшылы, ағартушы композитор Абай Құнанбайұлының күнін атап өту мақсатында Алакөл ауданында Абай орта мектебінің алдына орнатылған Абай Құнанбаевтың ескерткішіне гүл шоқтары қойылды, деп хабарлайды Tinfo.kz. Айта кетейік, Қазақстан Республикасы Үкіметінің қаулысымен 10 тамыз – Абай күні болып жарияланып, мемлекеттік мерекелер күнтізбесіне енгізілді. Ауданда өткен шараға Үшарал қаласының әкімі М.Сайдильдинов пен мәдениет және білім саласының қызметкерлері қатысып, ақын рухына тағзым етілді. Сондай-ақ, ауданда бұдан бөлек Абай күніне орай онлайн мәдени шаралар да өткізілуде. Аудандық ішкі саясат бөлімінің мемлекеттік әлеуметтік тапсырысы негізінде "Рухани жаңғыру: Болашаққа бағдар" бағдарламасы және Ұлы Абайдың 175 жылдығы және 10 тамыз - Абай күніне орай "Мәңгілік елдің Ұлы Абайы" тақырыбында Zoom мобильды қосымшасы арқылы онлайн кездесу өткізілді. Аталған шарада "Рухтың биігі - Абай" тақырыбында қоғамдық келісім кеңесінің төрайымы К. Бектемисова, "Ляйсан татар-мәдени орталығы" ҚБ жетекшісі И. Абдухаликова, "Рухани жаңғыру аясында атқарылған іс-шаралар" тақырыбында Тіл оқыту әдістемелік орталығының әдіскер меңгерушісі А. Дарханбаева, "Рухани жаңғыру - халқымызға рухани жол көрсететін нақты бағдар" атты тақырыбында қоғамдық келісім кеңесінің мүшесі К. Абдрахманова, "Ұлы даланың Ұлы Абайы" тақырыбында аудандық кітапхана директорының орынбасары Ж. Омарова, Қайнар ауылдық округі әкімі аппаратының бас маманы Ә. Ермұханов пен Жайпақ ауылының тұрғыны Н. Сериковалар баяндама оқып, рухани жаңғырумен байланыстыра отырып, Абай Құнанбайұлының өмірінен сыр шертті. Бүгінгі ішкі саясат бөлімінің басшысы М. Сүлейменовтың төрағалығымен өткен кездесуге Қайнар және Жайпақ ауылдық округтерінің тұрғындары, жастары мен ұстаздары қатысты.

Ұлы ақын ескерткішіне гүл қойылды

10 тамыз  Абай күніне орай бүгін ұлы ақынның ескерткішіне гүл шоқтарын қою акциясы өтті, деп хабарлайды Tinfo.kz. Атаулы күнге орай облысымыздың түкпір-түкпірінде ұлы ақынның ескерткіштеріне тағзым етілді. Бұл акциядан қарасайлықтар да шет қалған жоқ. Атап айтар болсақ,  Райымбек округіндегі Абай ауылындағы орналасқан Абай Құнанбайұлының  ескерткішіне   аталған округтің әкімі  Елжан Төленбаев пен ауылдық ақсақалдар кеңесінің мүшесі Әбләшім Беспаев, аудандық мәдениет және тілдерді дамыту бөлімінің бас маманы Ділда Әбілқасымова, ықылас гүлін қойды. Биыл қазақ халқының ұлы ақыны, ойшыл Абай Құнанбайұлының туғанына 175 жыл. Осы орайда Мемлекет басшысы  Қасым-Жомарт Тоқаев ақынның мерейтойын атап өту туралы Жарлыққа қол қойған болатын. Сол уақыттан бастап   10 тамыз – еліміз бойынша Абай күні болып белгіленді.  

Абай өлеңдеріне арналған онлайн концерт өтті

10 тамыз Абай күніне орай «Nur Otan» партиясы Алматы облыстық филиалының ұйымдастыруымен ақын өлеңдерінің онлайн кеші өтті, деп хабарлайды Tinfo.kz. Кеш қонақтары «Талдықорған» халықтық, фольклорлы-этнографикалық ән-би ансамблінің әншілері мен жас ақындары хәкім Абайдың өлеңдерін әуендетіп, өз арнауларын айтты. Олардың қатарында Абылай Қожақов, Жания Спанова, Тоқтарбек Заманбеков, Арайлым Ермекқызы, Марал Сеитова, Мадина Турдахун. Онлайн концерт «Nur Otan» партиясы Алматы облыстық филиалының «Фейсбук» және «Инстаграм» әлеуметтік әлеуметтік желісіндегі ресми парақшаларында көрсетілді. Еске салсақ, ҚР Үкіметінің Қаулысымен 10 тамыз Абай күні болып белгіленді. Өткен жылы Мемлекет басшысы Қасым-Жомарт Тоқаев Абай Құнанбайұлының 175 жылдық мерейтойын мерекелеу туралы заңға қол қойды.

Талдықорғандық оқушы Абайға арналған ғылыми байқаудың жеңімпазы атанды

Талдықорған қаласының 5 сынып оқушысы Раушан Асқар «Білім-Өркениеті» Республикалық ғылыми-зерттеу орталығы Ұлы Абайдың туғанына 175 жыл толуына орай ұйымдастырған «Абай мұрасы – Қазақтың қасиетті қазынасы» халықаралық ғылыми мақалалар байқауының жеңімпазы атанып, «Абай Құнанбайұлы» төсбелгісімен марапатталды, деп хабарлайды Tinfo.kz. Байқауда Түркия, Ресей, Қырғызстан, Өзбекстан және Қазақстаннан 500-ге жуық үміткер бағын сынаған. Білім додасында оқ бойы озып шыққан Раушанның «Абай Құнанбайұлының өлеңдерінің ерекшеліктері» деген тақырыптағы шағын эссесі үздік деп танылып, эсселер жинағына енді. Ұлы ақынның өлеңдеріне деген баланың қызығушылығын оятып, білім әлеміне бағдар көрсеткен ұстазы Нұргүл Иманбаева екенін айту ләзім. Абай Құнанбайұлы – қазақтың көрнекті ойшылы, ақын, адамзат тарихындағы дана тұлғалардың бірі. Абай атамыз келер ұрпаққа мағынасы терең қара сөздерін, ғибратты өлеңдерін қалдырды. Назарбаев Зияткерлік мектебінің оқушысы Раушан Асқар Абай шығармашылығына қатысты мәліметтерді тыңғылықты қарап, түрлі дереккөздерден ізденген. «Жастайынан әжесінің аузынан қазақтың батырлар жырымен, ертегілерімен сусындап өскен бала 35-40 жасына жеткенде өзіндік ақындық қабілетін таныта бастайды. Ақын өлеңдерінің мағынасы терең, тәрбиелік мәні зор. Абай атамыз XIX ғасырда өмір сүргендіктен қазақ жеріндегі теңсіздік, биліктегі қайшылықтар туралы жазды. Одан бөлек, адамның бойындағы ақыл, сана, білім, достық, ғашықтық сезім жайында жазып, артына мол мұра қалдырды. Ақын кейбір өлеңдерінде болашақты болжаған сияқты. Келер заман жастарының қандай болатынын да дәл айтып кетті», - дейді жас абайтанушы Раушан Асқар өз зерттеу эссесінде.

Облыстық сыбайлас жемқорлыққа қарсы департамент басшылығы Қарасай ауданында мониторинг жүргізді

Қазақстан Республикасы Сыбайлас жемқорлыққа қарсы іс-қимыл агенттігінің (Сыбайлас жемқорлыққа қарсы қызмет) Алматы облысы бойынша департаменті ҚР Президенті Қасым-Жомарт Тоқаевтың «Халық үніне құлақ асатын мемлекет» тұжырымдамасын орындау мақсатында сыбайлас жемқорлық құқық бұзушылықтардың алдын алу бойынша ауқымды ақпараттық-түсіндіру жұмыстарын жүргізуде. Тұжырымдаманы іске асыру мақсатында Департаментпен                                  «ANTIKOR.LIVE» жобасы аясында әр түрлі әлеуметтік тақырыптар бойынша күнделікті тікелей эфирлер өткізіледі, сонымен қатар, қоғам өкілдерімен, Департамент жанындағы арнайы мониторингтік топ мүшелерімен, сондай-ақ "Жетісу-адалдық алаңы" жобалық кеңсесінің менеджерлерімен дәрілік заттармен қамтамасыз ету және дәрі-дәрмектерге бағаны көтеру фактілерін анықтау бойынша мониторингтік жұмыстар жүргізілуде. Сонымен қатар, Қазақстан Республикасы Сыбайлас жемқорлыққа қарсы іс-қимыл агенттігінің (Сыбайлас жемқорлыққа қарсы қызмет) бастамасымен мемлекеттік органдар «Сервистік әкімдік» форматындағы ашық жұмыс моделіне көшуде. Бұл жоба «Халық үніне құлақ асатын мемлекет» тұжырымдамасын іске асыру нысандарының бірі болып табылады. ҚР Президенті Қасым-Жомарт Тоқаевпен айтылған тұжырымдаманы іске асырудың маңыздылығын ескере отырып, Департамент Алматы облысының аудандары мен қалаларының сыбайлас жемқорлыққа қарсы саясатты іске асыру жөніндегі қызметіне тұрақты түрде мониторинг жүргізеді. Осы орайда, ағымдағы жылдың 07 тамызында Департамент басшысы Ернар Мақажанов және Департамент басшысының бірінші орынбасары Жандос Жұмабаев "Сервистік әкімдік" жобасын іске асыру барысын мониторингілеу мақсатында, сондай-ақ азаматтардың сыбайлас жемқорлыққа қарсы мінез-құлық моделін одан әрі дамыту, аудандарда тұрмыстық сыбайлас жемқорлықтың болуына ықпал ететін  жағдайларды анықтау мақсатында Алматы облысының Қарасай ауданына іс-сапармен келді. Іс-сапар аясында Департамент басшысы Ернар Мақажанов ZOOM арқылы азаматтарды қабылдау өткізді. Сондай-ақ, Қарасай ауданының ауруханаларына гуманитарлық көмектің түсуіне және дәріханаларда дәрі-дәрмектерге бағаны көтеру фактілерін анықтау бойынша тиісті мониторинг жүргізді. Сонымен қатар, облыстық Сыбайлас жемқорлыққа қарсы Департаментінің басшысы Ернар Мақажанов Қарасай ауданында сыбайлас жемқорлықтың алдын алу мақсатында қабылданып жатқан іс-шаралармен таныстырылды.

Талдықорғандағы қонақ үйлердің бірінде 10 жезөкше ұсталды (ВИДЕО)

Талдықорған қаласындағы қонақ үйлердің бірінде жезөкшелер қызмет ететін притон анықталды. Тексеру кезінде ол жерде 10 бойжеткен ұсталды. Олардың үшеуі Өзбекстан азаматшалары болып шықты, еп хабарлайды Tinfo.kz. Жеңіл жүрісті қыздардың қызметін 29 жастағы жергілікті ару ұйымдастырып, жасырып келген. «Көрші республикалардан келген заңсыз иммигранттарға қатысты әкімшілік хаттамалар толтырылды. Сот шешіміне сәйкес олар жақын арада елімізден депортацияланады. Өйткені олардың барлығы қолданыстағы көші-қон заңнамасын өрескел бұзып, Қазақстанда жүргені білгілі болды. Сонымен қатар, барлық ұсталған адамдар, оның ішінде қонақ үй кешенінің бірнеше қызметкері полицияның барлық есеп базалары бойынша тексеруден өтті. Себебі, көп жағдайда бұл санаттағы азаматтардың әртүрлі қылмыстарға қатысы болады», - деді Криминалдық полиция басқармасының бастығы полиция полковнигі Асхат Данияр. Қыздар ақшалай сыйақы үшін интимдік қызметтер көрсеткендерін растады.https://www.instagram.com/p/CDlRUhDHOjS/ «Жезөкшелікпен айналысуға арналған притонды ұстау, сондай-ақ жеңгетайлық үшін осы мекеменің әкімшісі жауапқа тартылды. Әйел пәтерді жеңіл жүрісті қыздарға жалға берген, олар әр клиенттен түскен пайданың белгілі бір бөлігін жеңгетайға тапсырып отырған. Сондай-ақ, қонақүй әкімшісі карантиндік шараларды өрескел бұзғаны үшін де жауапкершілікке тартылады»,- деп атап өтті Асхат Данияр. Күдікті клиенттен ақша алу үстінде ұсталды. Жеке тексеру барысында алынған барлық айғақзаттар жезөкшелікпен айналысу үшін притонды ұйымдастыру немесе ұстау дерегі бойынша қозғалған қылмыстық іске тіркелді. Дерек бойынша тергеу басталды.

Қазақстанда жаңа мейрам бекітілді

ҚР Үкіметінің Қаулысымен 10 тамыз Абай күні болып белгіленді, деп хабарлайды Tinfo.kz. «Қазақстан Республикасындағы мерекелік күндердің тізбесін бекіту туралы» Қазақстан Республикасы Үкіметінің 2017 жылғы 31 қазандағы №689 қаулысына толықтыру енгізу туралы «Қазақстан Республикасындағы мерекелер туралы» 2001 жылғы 13 желтоқсандағы Қазақстан Республикасы Заңының 4-бабына сәйкес Қазақстан Республикасының Үкіметі ҚАУЛЫ ЕТЕДІ: «Қазақстан Республикасындағы мерекелік күндердің тізбесін бекіту туралы» Қазақстан Республикасы Үкіметінің 2017 жылғы 31 қазандағы № 689 қаулысына (Қазақстан Республикасының ПҮАЖ-ы, 2017 ж., № 53, 343-құжат) мынадай толықтыру енгізілсін: Көрсетілген қаулымен бекітілген Қазақстан Республикасындағы мерекелік күндердің тізбесі мынадай мазмұндағы 22-1-тармақпен толықтырылсын: «22-1. Абай күні – 10 тамыз». Осы қаулы алғашқы ресми жарияланған күнінен кейін қолданысқа енгізіледі. Қазақстан Республикасының Премьер-Министрі А. Мамин. Еске салсақ, өткен жылы Мемлекет басшысы Қасым-Жомарт Тоқаев Абай Құнанбайұлының 175 жылдық мерейтойын мерекелеу туралы заңға қол қойды.

Талдықорғанда "Адамзаттың Абайы" жыр-жинағы жарық көрді

Жетісу жерінде ұлы ақын Абай Құнанбайұлының 175 жылдық мерейтойына орай "Адамзаттың Абайы" атты жыр-жинағы басылып шықты, деп хабарлайды Tinfo.kz. Шығармалар жинағы Алматы облысының әкімі Амандық Баталовтың қолдауымен жарық көрді. Кітапқа жетісулық жазба ақындардың 100-ге тарта өлең-жырлары топтастырылған. Еске салсақ, Абай Құнанбайұлының 175 жылдық мерейтойына орай  қаңтар мен наурыз айы аралығында "Абайға арнау" атты облыстық жыр мүшәйрасы өткізілген. Байқауға Жетісу өңірінен 200-ге тарта ақын-жазушы қатысып, 100 ақынның өлеңі кітапқа енгізілді.  "Адамзаттың Абайы" атты жыр-жинағының тұсаукесеріне Алматы облысы әкімінің орынбасары Батыржан Байжұманов, Алматы облысының мәдениет, архивтер және құжаттама басқармасының басшысы Марлен Көлбаев, «Жетісу» телеарнасының директоры Серік Әбікенұлы, Қазақстан Жазушылар одағының Жетісу өңірлік филиалының төрағасы, «Жетісу» газетінің бас редакторы Әміре Әрін қатысып, лента қию рәсімін орындады. Кітап 1000 данамен жарыққа шықты. Айта кетейік, жинақтың 500 данасы ұлы ойшыл туған жер - Шығыс Қазақстан өңіріне сый ретінде табысталады.

Құрбан айтта Талдықорған өңіріндегі 5,5 мың астам отбасыға ет таратылды

Құрбан айтта Талдықорған өңірінде 23200 кг ет 5531 отбасына таратылды, деп хабарлайды Tinfo.kz. Бұл туралы баспасөз маслихатында ҚМДБ Талдықорған өңірі бас имамы Ардақ Нүсіпханұлы мәлімдеді. Бас имамның айтуынша, өткен құрбан айттың 3 күнінде Талдықорған өңірі бойынша құрбан шалу рәсіміне қатысты ұйымдастыру-үйлестіру жұмыстары жоғары деңгейде өтті. Үйлестіру жұмыстарына байланысты арнайы штаб құрылып, азаматтар арасында санитарлық талаптардың сақталуы қатаң орындалды. QURBAN2020.KZ жобасы арқылы келіп түскен құрбандық шалуға тапсырыстармен қатар, ет алуға өтініш білдірген азаматтардың да сұраныстары толығымен орындалды. Жалпы өңір бойынша: 1 түйе, 56 сиыр, 529 қой, 60 тоқты,22 ешкі сойылып, 5531 отбасына еттері таратылды. Соның ішінде онлайн режимінде 3 ірі қара, 53 қой, 41 тоқты, 5 ешкі сойылып, 805 отбасына еттері жеткізілді. Ал қосымша 6 сиыр, 45 қой, 7 тоқты сойылып, 316 адамға еттері берілген. Жалпы жұмыс нәтижесінде 23200 кг ет 5531 отбасына таратылған. "Осы ретте Қазақстан мұсылмандары діни басқармасының қайырымдылық бағытта қолға алған www.qurban2020.kz жобасына белсенді түрде атсалысып, қайырымды жан ретінда қайырын көрсеткен, мұқтаждың мұңын бөлісіп, сауапты амалға үлес қосқан еріктілер тобы, автоеріктілер, қала әкімі және орынбасарлары, қалалық ауыл шаруашылық бөлім және басшысы, қалалық ішкі саясат бөлімі, ветеринардық дәрігерлер, СЭС, жастар басқармасына, мешіт және қаланың автоеріктілеріне, барлық имамдарға, ет цехын 3 күнге тегін ұсынған Амиров Мұса ағамызға алғыс айтамын Алла баршаңызға разы болсын, Алла Тағала жасаған қайырымдылықтың қайырын өздеріңізге еселеп қайтарсын. Әмин" - деп сөзін қорытындылады Ардақ Нүсіпханұлы.

Талғарда жер алып беремін деген алаяқ ұсталды

Алматы облысында жер учаскелерін саудалау бойынша алаяқтық әрекеттерге қатысы бар деген күдікпен Талғар ауданының 37 жастағы тұрғыны ұсталды. Оның жалпы сомасы 7 миллионға жуық материалдық шығын келтіргені анықталды, деп хабарлайды Tinfo.kz. Тергеу барысында алаяқ өз құрбандарына нарықтық бағадан төмен бағада жер телімдерін алып берем деп, қолдарында бар қомақты қаржыны алып, сан соқтырған. Полиция таратқан ақпаратқа сәйкес, күдікті былтырғы жылдың соңында өзінде жоқ жерлерді алып берем деген желеумен бір тұрғыннан 2,7 миллион, екінші азаматтан 1,2 миллион, ал үшінші құрбанынан 3 миллион теңгеге бағалап «Тойота» маркалы автокөлігін алып кеткен. «Аталған деректер бойынша ҚР Қылмыстық кодексінің 190-бабына сәйкес сотқа дейінгі тергеу амалдары жүргізіліп жатыр. Алаяқтық жасады деген күдікпен Талғар ауданының бұған дейін сотталмаған 37 жастағы тұрғыны ұсталды. Бұлтартпас айғақтар негізінде күдікті қылмыстарын мойындады. Қазіргі уақытта оның осыған ұқсас өзге де қылмыстарға қатысы бары тексерілуде. Күдікті сот шешімімен мекенжайын өзгертпеу туралы міндеттемемен босатылды», - Талғар қалалық ПБ бастығы полиция полковнигі Ерлан Қасым.

Жақсылық Үшкемпіровтың айтқандары

2 тамыз күні қазақтан шыққан тұңғыш Олимпиада чемпионы, Қазақ КСР еңбек сіңірген жаттықтырушысы, қоғам қайраткері, кәсіпкер Жақсылық Үшкемпіров дүние салды. Ол Қазақстан спорты мен руханиятында аты алтын әріптермен жазылған аңыз тұлға. Кәсіби спорттан алыстаған соң, Жақсылық аға жастарды спортпен баулуға, туған жерін гүлдендіруге, ауыл шаруашылығын көтеруге өмірін арнады.   Әр кездесу-жиында жастарды қанаттандырып, серпін беретін. Ағаның әр сөзінен елжандылық пен еңбекқорлық, адамгершілік пен қарапайымдылық сезілетін. Tinfo.kz редакциясы Жақсылық Үшкемпіровтің әр жылдары сұхбат барысында, кездесулер кезінде ел мен ұлт тағдыры, жастар болашағы, кәсіп туралы айтқан ойларын топтастырып, оқырмандарға ұсынады.  *** Біріншіден, әркім өз Отанын сүю қажет. Күрес алаңына шыққан сайын, елім үшін бірінші болсам деп армандадым... Жас кезде ақшаны ойламаған едік. Осы идеологияны сақтап, оны жастарға жеткізуіміз керек: Құрметті адам болу үшін өз Отанына сүйіспеншілікпен қарау қажет. *** Бүкіл халық сыйлайды. Рах­­мет. Шүкір. Елбасының өзі тәуел­сіз­діктен кейін туған қанша­ма спорт­шының алдында мені ашық­тан ашық бір бас жоғары қойып келеді. Халық тұңғыш Олим­пиада чемпионымыз деп ер­келе­теді. Осының бәрі қолға алған ісімнің берекет табуына себепші болды. *** Ата кәсіппен айналысу – ұрпақтардың міндеті. Мұнай таусылса да, мал қырылып қалмайды. Сол себепті жастарды ата кәсіппен айналысуға итермелеу керек. Мен қаншама шығынға баттым, бірақ өз миссиямды жалғастырып келемін, шама келсе жастарға осыны үйреткім келеді. *** Менің бү­гінгі таңда көзімнің жеткені – біз­дің көпшілігіміз қарапайым ға­на қажетті құжаттарды қара­пайым түрде ғана толтырып тиісті мекеменің қолына тап-тұйнақтай етіп табыстай алмаймыз, ерін­шектігіміз ұстайды, әлі де болса немқұрайдылығымыз басым. Мәселен, мен белгілі бір соманы алу үшін банктің соңынан 2 жыл жүгірдім, қаншама білімімді сарп еттім. Бірақ, бәрібір өзіміздің ор­тадан тыс ешкімге жалынбадым, ешкімнен көмек сұрамадым. Жанымда қаншама білімді азамат жұмыс істейді, солардың бәрі атсалысты, ақыры 2 жылдан кейін несие ақша қолыма тиді. *** Кәсіпкерлік спорт сияқты. Табандылық пен шыдамдылық қажет. Бірінші болып жетістікке жету үшін жігер мен еңбек етемін деген ұмтылыс керек. *** Жамбыл ауданындағы Мыңбаев ауылында спорт залы және 100 балаға арналған балабақша аштым. Менің ойымша, молшылықта тұратын әрбір тұлға қасындағы адамдарға көмектесуге міндетті. Мысалы, егер әрбір азамат бір ағаштан отырғызса, қандай керемет болар еді!  *** Біз дамыған 50 елдің қатарына кіріп, әлемдегі ең дамыған 30 мемлекеттің біріне де айналуымыз керек. Бұл үшін бір-бірімізге қол ұшын беріп, қолдау жасауымыз қажет.  *** Менің ойымша, спортпен айналысу — ұлт денсаулығын сақтау. Мысалы, «100 мектеп, 100 аурухана» бағдарламасы бар. Меніңше, 50 емхананың орнына 50 спорт кешенін салу керек.  *** Енді мемлекеттік тілдің өркендемей жатқан жайы болса, бұл үшін мемлекетті де, Қазақстанды мекендеп отырған өзге ұлт өкілдерін де айыптаудың қажеті жоқ. Бəрі де өзімізден. Тіліміз үшін əрқайсымыздың ортақ жауапкершілігіміз бар екендігін ұғынатын кез келді. *** Менің бір арманым бар. Осы көп болса 5 мыңнан аса ауыл бар шығар. Соны қазақтың 5 мың жігіті көтеріп жіберсе, одан артық қандай бақыт керек. Мен соны ойлаймын. e-history.kz, mangystaumedia.kz, egemen.kz, 7-su.kz, atameken.kz сайттарынан мәлімет алынды.